ஹரீஸின் பக்கம் திரும்பிய மு.காவின் பார்வை!
அபு அலா
ஸ்ரீலங்கா முஸ்லிம் காங்கிரஸின் தற்போதைய அரசியல் நகர்வுகளிலும் உட்கட்சி விவாதங்களிலும் முன்னாள் பாராளுமன்ற உறுப்பினர் எச்.எம்.எம்.ஹரீஸின் நிலைப்பாடு மற்றும் அவரது அரசியல் ஆளுமை குறித்த விவேகப் பார்வை திரும்பியுள்ளன.
அம்பாறை மாவட்ட முஸ்லிம் மக்களின் பிரதிநிதித்துவத்திலும், கட்சியின் அடிமட்டத் தொண்டர்களின் ஆதரவைத் தக்கவைத்துக்கொள்வதிலும் ஹரீஸ் வகிக்கும் பங்கு, கட்சியின் தலைவர் ரவூப் ஹக்கீம் உள்ளிட்ட உயர்மட்டக் குழுவின் பார்வையை அவரின் பக்கம் திரும்பச் செய்துள்ளது.
அரசியல் ஆளுமையும் அடிமட்டத் தொடர்பும் கட்சியின் ஆரம்பகால உறுப்பினர்களில் ஒருவரான எச்.எம்.எம்.ஹரீஸ், அம்பாறை மாவட்டத்திலும் குறிப்பாக கல்முனைப் பிராந்தியத்திலும் தனக்கென உறுதியான ஒரு வாக்காளர் தளத்தைக் கொண்டவர். கட்சி பல சவால்களையும் நெருக்கடிகளையும் கொடுத்த காலங்களில், அடிமட்டத் தொண்டர்களுடனான நேரடித் தொடர்பை இழக்காமல் செயல்பட்டதே அவரது முக்கிய பலமாகும்.
இதன் காரணமாகவே, கட்சியின் கொள்கைத் தீர்மானங்கள் மற்றும் தேர்தல் உத்திகளை வகுக்கும்போது அவரது கருத்துகளுக்கு தலைவர் உள்ளிட்ட உயர்மட்டக் குழுவினர் முக்கியத்துவமளிக்க வேண்டிய தேவை உருவாகியது.
உட்கட்சி சவால்களும் தலைமையின் பார்வையும்
முஸ்லிம் காங்கிரஸுக்குள் அவ்வப்போது எழும் கருத்து வேறுபாடுகள் மற்றும் பிராந்திய அரசியல் சார்ந்த கோரிக்கைகளின்போது, ஹரீஸின் நிலைப்பாடு என்ன என்பது கட்சியின் எதிர்கால நகர்வுகளுக்கு தீர்மானமிக்கதாக அமைகிறது.
தனது பிராந்திய மக்களின் உரிமைகளுக்காகவும் அபிவிருத்திக்காகவும் குரல்கொடுக்கும் அவரது பாணி, இன்றுவரை தொடர்ந்தே செல்கின்றது என்றால் அது மிகையாகாது.