பாதிக்கப்பட்டவர்களுக்கு நீதி கிடைக்க வேண்டும் என்பதில் நாங்கள் உறுதியாக இருக்கிறோம் சஹ்ரானை நான் கண்டதுமில்லை; பேசியதுமில்லை!” – ரிஷாட் பதியுதீன் அதிரடி அறிவிப்பு..
ஈஸ்டர் தாக்குதல் தொடர்பாக அண்மையில் வெளியாகி வரும் தகவல்கள் அரசியல் வட்டாரத்தில் மீண்டும் பரபரப்பை ஏற்படுத்தியுள்ள நிலையில், “சஹ்ரான் என்ற பயங்கரவாதியை நான் கண்டதுமில்லை; அவருடன் பேசியதுமில்லை” என அகில இலங்கை மக்கள் காங்கிரஸின் தலைவரும் பாராளுமன்ற உறுப்பினருமான றிஷாட் பதியுதீன் திட்டவட்டமாக தெரிவித்துள்ளார்.
நிந்தவூரில் நடைபெற்ற ஊடகவியலாளர் சந்திப்பில் கருத்து தெரிவிக்கையிலேயே அவர் மேற்கண்டவாறு தெரிவித்தார்.
அண்மையில் நீதிமன்றத்தில் முன்வைக்கப்பட்ட விடயங்களை சில ஊடகங்கள் வேறு விதமாக செய்தியாக்கியுள்ளதாக றிஷாட் பதியுதீன் குற்றஞ்சாட்டினார். தம்மை ஏழு மாதங்கள் விசாரணை செய்த பின்னர் நிரபராதி என விடுவிக்க சட்டமா அதிபர் திணைக்களமே பரிந்துரை செய்திருந்த நிலையில், முன்னாள் விடுதலைப் புலி உறுப்பினர் ஒருவர் புலனாய்வுத் துறையிடம் தெரிவித்ததாகக் கூறப்படும் தகவல் “further report” ஒன்றில் பதிவாகியிருந்ததாகவும், அந்தத் தகவல் நீதிமன்றத்தில் குறிப்பிடப்பட்டதை சில ஊடகங்கள் தமக்குச் சாதகமான வகையில் வேறு திசையில் எடுத்துச் சென்றுள்ளதாகவும் அவர் தெரிவித்தார்.
இதன் போது மேலும் அகில இலங்கை மக்கள் காங்கிரஸ் கட்சியின் தலைவர் ரிசாட் மேலும் தெரிவித்ததாவது:
“ஈஸ்டர் தாக்குதல் சம்பவத்திற்கும் முஸ்லிம் சமூகத்திற்கும் எந்தவிதமான தொடர்பும் கிடையாது. சஹ்ரானின் பயங்கரவாத செயற்பாடுகளுக்கு முஸ்லிம் சமூகமோ, முஸ்லிம் அரசியல் தலைமைகளோ ஒருபோதும் ஆதரவாக இருந்ததில்லை.”
ஆதாரமற்ற குற்றச்சாட்டுகளுக்கு சட்டநடவடிக்கை!”
தனக்கும் தனது கட்சிக்கும் எதிராக முன்னாள் விடுதலைப் புலிகள் உறுப்பினர் ஒருவர் முன்வைத்துள்ளதாகக் கூறப்படும் குற்றச்சாட்டுகளையும் ரிஷாட் பதியுதீன் கடுமையாக நிராகரித்தார்.
அதேபோன்று, வர்த்தகர் அலாவுதீனுடன் தமக்கிருந்த தொடர்பை அடிப்படையாகக் கொண்டு சஹ்ரானுடன் தொடர்பு ஏற்பட்டதாக Additional Solicitor General நீதிமன்றத்தில் தெரிவித்ததாக வெளியாகிய செய்தியையும் அவர் மறுத்தார்.
ஏற்கனவே கைது செய்யப்பட்டு, நீண்டகால விசாரணைக்கு உட்படுத்தப்பட்டு, பின்னர் நீதிமன்றத்தால் விடுவிக்கப்பட்ட தம்மை மீண்டும் ஈஸ்டர் தாக்குதலுடன் தொடர்புபடுத்த முயற்சிப்பது சதியாக இருக்கலாம் எனத் தாம் கருதுவதாக றிஷாட் பதியுதீன் தெரிவித்தார். எனினும், தாம் எந்தவித அச்சத்துக்கும் உள்ளாகவில்லை என்றும், ஈஸ்டர் தாக்குதலுடன் தமக்கு எந்தத் தொடர்பும் இல்லை என்பது தமக்குத் தெரியும் என்றும் அவர் கூறினார்.
ஒரு பாராளுமன்ற உறுப்பினராகவும் அரசியல் கட்சியின் தலைவராகவும் இருந்த என்னை, சபாநாயகருக்குக் கூட அறிவிக்காமல் இரவோடு இரவாக கைது செய்து சிறையில் அடைத்தனர்” என ரிஷாட் பதியுதீன் தெரிவித்தார்
அதேவேளை, ஈஸ்டர் தாக்குதலில் பாதிக்கப்பட்டவர்களுக்கு உண்மையான நீதி கிடைக்க வேண்டும் என்பதில் தாம் உறுதியாக இருப்பதாகவும் ரிஷாட் பதியுதீன் தெரிவித்தார்.
ஈஸ்டர் தாக்குதல் தொடர்பாக ஜனாதிபதி ஆணைக்குழு, பாராளுமன்றத் தெரிவுக்குழு உள்ளிட்ட பல்வேறு விசாரணைகள் இடம்பெற்றுள்ளதுடன், தற்போது விசேட விசாரணைகளும் இடம்பெற்று வருவதாகக் குறிப்பிட்ட அவர், இந்த நடவடிக்கைகளின் ஊடாக உண்மையான நிலை வெளிவரும் என்ற நம்பிக்கை தமக்கு இருப்பதாக தெரிவித்தார்.
இதேவேளை, அனோஜனுக்கு மரண தண்டனை விதிக்கப்பட்டுள்ளதாக வெளியாகியுள்ள தகவல் தொடர்பாக வெளிவிவகார அமைச்சருடன் பேசுவதற்கு தாம் முயற்சித்ததாகவும் ரிஷாட் பதியுதீன் தெரிவித்தார்.
“இந்த விடயம் தொடர்பாக uiவெளிவிவகார அமைச்சருடன் பேசுவதற்கு நான் தொடர்புகொண்டேன். ஆனால் அவர் வெளிநாட்டில் இருப்பதால் தொடர்புகொள்ள முடியவில்லை. இந்த விவகாரத்தில் இலங்கை அரசாங்கம் உடனடியாக உரிய நடவடிக்கைகளை மேற்கொள்ள வேண்டும் எனவும் கோரிக்கை விடுத்தார்.
